راولپنڈی ۔23اگست (اے پی پی) چیف آف آرمی سٹاف فیلڈ مارشل سید عاصم منیر نشان امتیاز (ملٹری)، ہلال جرات تربت بلوچستان دا دورہ کیتا۔ ایں دورے دا مقصد سکیورٹی دی موجودہ صورتحال، ترقیاتی اقدامات دا جائزہ گھنݨ اتے بلوچستان دے استحکام اتے خوشحالی کیتے فوجی و سول اداریں وچال ہم آہنگی کوں مضبوط بݨاوݨ ہئی۔ پاک فوج دے شعبہ تعلقات عامہ (آئی ایس پی آر) ولوں جاری پریس ریلیز موجب ایں موقع تے وزیراعلیٰ بلوچستان اتے چیف سیکرٹری بلوچستان سودھے ݙوجھے حکام وی موجود ہن۔ آرمی چیف کوں سکیورٹی دی صورتحال دے حوالے نال جامع بریفنگ ݙتی ڳئی جیں اچ خطرے دے تناظر اتے فتنہ الہندستان دے خلاف کامیاب آپریشنز، جاری ترقیاتی منصوبیں اتے جنوبی بلوچستان اچ سماجی و اقتصادی حالات کوں بہتر بݨاوݨ دیاں کوششاں شامل ہن۔ انہاں وزیراعلیٰ بلوچستان اتے سول انتظامیہ دے نمائندیں نال ڳالھ مہاڑ دے دوران چنڳی حکومت، انفراسٹرکچر دی ترقی اتے عوام تے مبنی ترقی دی اہمیت تے روشنی پاتی۔ انہاں بلوچستان دے عوام کوں پیش آوݨ آلے چیلنجز نال نبڑݨ کیتے سانجھیاں سول ملٹری کوششاں دی اہمیت تے زور ݙتا اتے جنوبی بلوچستان دی سماجی و اقتصادی ترقی کوں بہتر بݨاوݨ کیتے سارے اقدامات کیتے غیر متزلزل حمایت دا اعادہ کیتا۔ فیلڈ مارشل سید عاصم منیر امن، خوشحالی اتے پائیدار ترقی دے حصول اچ بلوچستان دے عوام دے نال مونڈھے نال مونڈھا ملا تے کھڑے تھیوݨ دے پاک فوج دے عزم دا اعادہ کیتا۔ چیف آف آرمی سٹاف فوجیاں نال ڳالھ مہاڑ دے دوران انہاں دے اُچے حوصلے، آپریشنل تیاری اتے قومی خودمختاری دے تحفظ کیتے غیر متزلزل عزم دی تعریف کیتی۔ انہاں اوکھے حالات اچ خطے اچ امن و استحکام کوں یقینی بݨاوݨ اچ انہاں دے کردار دی تعریف کیتی۔ ایں توں پہلے فیلڈ مارشل سید عاصم منیر دے آوݨ تے کور کمانڈر بلوچستان انہاں دا استقبال کیتا۔
