اسلام آباد – 14 – آگسٽ (اي پي پي) وزيراعظم محمد شهباز شريف قوم کي پاڪستان جي آزادي جي ڏهاڙي جي ڊائمنڊ جوبلي تي مبارڪباد ڏيندي چيو آهي ته وطن عزيز هڪ مقدس امانت ۽ مشن آهي، ان جو هڪ مرحلو پاڪستان قائم ٿيڻ جي شڪل ۾ مڪمل ٿي چڪو پر ٻيو مرحلو اڃا اڻ مڪمل آهي جيڪو اسان کي پورو ڪرڻو آهي، ورڇ جي وقت جنهن ملڪ کي اسان جي جائز وسيلن کان به محروم ڪيو ويو هو، اهو الحمدالله اڄ دنيا جي مهذب قومن ۾ پنهنجو ڀرپور ڪردار ادا ڪري رهيو آهي، دنيا جي ستين ۽ اسلامي دنيا جي پهرين ائٽمي قوت آهي، قوم جي حيثيت سان اڄ اسان کي پنهنجي ڪوتاهين تي پنهنجو احتساب ڪرڻو پوندو ان جي لاءِ اسان کي قومي مڪالمو ڪرڻ جي ضرورت آهي، ميثاق معيشت ان جي شروعات جو پهريون نقطو بڻجي سگهي ٿو. اهڙن خيالن جو اظهار هن ڪنوينشن سينٽر ۾ آزادي جي ڏهاڙي جي ڊائمنڊ جوبلي جي موقعي تي پرچم ڪشائي جي مرڪزي تقريب کي خطاب ڪندي ڪيو. ان موقعي تي قومي ترانو پڻ پڙهيو ويو. تقريب ۾ سينيٽ چيئرمين صادق سنجراڻي، قومي اسيمبلي جي اسپيڪر راجا پرويز اشرف، پرڏيهي وزير بلاول ڀٽو زرداري، اطلاعات ۽ نشريات واري وفاقي وزير مريم اورنگزيب، قانون واري وزير سينيٽر اعظم نذير تارڙ، رياض پيرزاده، شاهه زين بگٽي، شيري رحمان، مرتضيٰ جاويد عباسي، مولانا اسعد محمود، خالد مگسي، انجنيئر امير مقام، عسڪري قيادت، پارليامينٽ ميمبرن، غيرملڪي سفڪارتن ۽ مختلف شعبن سان تعلق رکندڙ ماڻهن جي وڏي انگ شرڪت ڪئي. ان موقعي تي خطاب ڪندي وزيراعظم چيو ته اڄ اسان سڀ الله جي اڏو شڪر ادا ڪريون ٿا ته اڄ اسان پاڪستان قائم ٿيڻ جي 75 هين سال جون خوشيون ملهائي رهيا آهيون، آئون سڄي دنيا ۾ رهندڙ پاڪستانين کي مبارڪباد پيش ڪريان ٿو، پاڪستان جي ترقي ۽ تعمير ۾ انهن جي خدمتن کي خراج تحسين پيش ڪريان ٿو. وزيراعظم چيو ته اڄ جي ڏينهن اسان سڀني جي اها دعا آهي ته الله تعاليٰ والاريل ڄمون ۽ ڪشمير ۽ فلسطين جي محڪوم مسلمانن کي به جلد کان جلد آزادي جي نعمت سان نوازي. هن چيو ته تازين برساتن ۽ ٻوڏ جي نتيجي ۾ پاڪستان جي مختلف حصن خاص طور تي بلوچستان ۾ تمام گهڻو نقصان ٿيو، سوين ماڻهو الله کي پيارا ٿي ويا، ڪيترائي ٻار سدائين جي لاءِ پنهنجي ماءُ پيءُ کان وڇڙي ويا، الله تعاليٰ انهن سڀني کي جنت ۾ جڳهه عطا فرمائي ۽ زخمين کي صحتيابي عطا فرمائي. وزيراعظم چيو ته پاڪستان قائم ٿيڻ جي ولولا انگيز داستان اسان جي لاءِ هڪ سبق آهي ته جڏهن قومون پنهنجي لاءِ هڪ گڏيل نصب العين طئي ڪري ڇڏين ٿيون ته مشڪلاتن جا پهاڙ به انهن جو رستو نه ٿا روڪي سگهن ۽ سمنڊ به انهن جي رستي جي رڪاوٽ نه ٿو بڻجي سگهي. هن چيو ته شاعر مشرق علامه اقبال جي خواب سان مسلمانن جي لاءِ جدا وطن جي جيڪا روشني اڀري هئي ان وقت مخالف مايوسي پکيڙيندا هئا ته پاڪستان ڪڏهن قائم نه ٿو ٿي سگهي پر مشاهير پاڪستان جي عظمت کي سلام پيش ڪريون ٿا جن جي پڪي عزم ۽ پختي ارادي مايوسين کي پاش پاش ڪري ڇڏيو ۽ اڄ اسان هڪ آزاد، خودمختيار اسلامي جمهوري ملڪ جي فضائن ۾ ساهه کڻي رهيا آهيون، ان تي الله جا شڪر ادا ڪريون ٿا. وزيراعظم چيو ته ننڍي کنڊ جي مسلمانن ڪيترن ئي سالن تائين سامراج جو بهادري ۽ ثابت قدمي سان مقابلو ڪيو، انهن جا حوصلا ڪمزور نه ٿيا، انهن خون جا درياءِ عبور ڪيا، شهادتون ڏنيون، تاريخ جي سڀ کان وڏي هجرت جا ڏک برداشت ڪيا، پنهنجن کي وڃايو پر پنهنجو مقصد حاصل ڪرڻ ۾ ڪامياب رهيا، اهو انهن عظيم قربانين جو انعام هو ته الله تعاليٰ اسان کي هڪ نظرياتي ملڪ عطا ڪيو ۽ سامراج جي غلامي مان ڇوٽڪارو ڏياريو، اسان شهيدن کي خراج عقيدت پيش ۽ انهن جي درجن جي بلندي لاءِ دعا ڪريون ٿا. وزيراعظم چيو ته انهن مائرن، ڀينرن، ڌيئرن کي سلام پيش ڪريون ٿا جيڪي هنڌ جي ورڇ جي خوني لهرن جي ور چڙهي ويون. وزيراعظم چيو ته آزادي جي جدوجهد ۾ رڳو مسلمان ئي نه اقليتن به ڀرپور حصو وڌو، اسان انهن کي به سلام پيش ڪريون ٿا. وزيراعظم چيو ته قائداعظم محمد علي جناح فرمايو هو ته توهان سڀ پنهنجي مذهبي عقيدن جي ادائيگي ۾ پوري طرح آزاد آهيو جنهن جو مطلب ئي اهو هو ته مسلمان اڪثريت جي هن ملڪ ۾ آئين، جمهوريت ۽ قانون جي حڪمراني هوندي ۽ انهن ئي رهنما اصولن تحت اسان اڳتي وڌندا رهنداسين. وزيراعظم چيو ته اڄ جي ڏينهن پاڪستان جي سول سوسائٽي جي خدمتن جي اعتراف جو به ڏينهن آهي، عبدالستار ايڌي (مرحوم)، ڊاڪٽر رٿ فائو جهڙي انسان دوست سمورين شخصيتن جي خدمتن کي سلام پيش ڪريون ٿا، ميڊيا ۽ سمورن اهل قلم جي ڪردار جو ذڪر ڪرڻ کانسواءِ پاڪستان جي تاريخ مڪمل نه ٿي ٿي سگهي. هن چيو ته وطن عزيز هڪ مقدس امانت ۽ مشن آهي، ان جو هڪ مرحلو پاڪستان قائم ٿيڻ جي شڪل ۾ مڪمل ٿي چڪو پر ٻيو مرحلو اڃا نامڪمل آهي، هڪ مشن اسان جي بزرگن بي مثال جدوجهد سان پورو ڪيو پر ٻيو مشن اسان کي پورو ڪرڻو آهي. اهو مشن مقصدن کي عملي تعبير ڏيڻ جو آهي جيڪو پاڪستان قائم ٿيڻ جو اصل بنياد آهي ۽ جن جو ذڪر 23 مارچ 1940ع تي منظور ٿيندڙ تاريخي قرارداد پاڪستان ۾ موجود آهي. هن چيو ته ورڇ جي وقت جنهن ملڪ کي ان جي جائز وسيلن کان به محروم ڪيو ويو هو، اهو الحمدالله اڄ دنيا جي مهذب قومن ۾ پنهنجو ڀرپور ڪردار ادا ڪري رهيو آهي. صنعت ۽ حرفت ۽ معيشت ۾ ترقي ڪري رهيو آهي، تعليم ۽ صحت جي شعبن ۾ ذهين ۽ قابل ترين ماڻهو پيدا ڪري رهيو آهي، پاڪستان دنيا جي ستين ۽ اسلامي دنيا جي پهرين ائٽمي قوت آهي، شهيد ذوالفقار علي ڀٽو ان پروگرام جي شروعات ڪئي ۽ منهنجي قائد محمد نواز شريف ان کي مڪمل ڪيو. ان پروگرام سان واڳيل سموريون شخصيتون ۽ ادارا هن قوم جا محسن آهن، گڏيل قومن جي عالمي امن جي ڪوششن ۾ اسان جو نمايان ڪردار آهي، راندين جي ميدان ۾ پاڪستان جي رانديگرن قومي جهنڊو سربلند ڪيو آهي. هن چيو ته ائين نه آهي ته اسان ترقي ناهي ڪئي پر اها حقيقت پنهنجي جڳهه تي موجود آهي ته جنهن تسلسل ۽ رفتار سان پنهنجي منزل کي حاصل ڪرڻو هو ان ۾ اسان کان گڏيل ڪوتاهيون ٿيون آهن، اهو ئي اهو مشن آهي جيڪو اسان جي آڏو آهي ۽ جنهن کي اسان کي پورو ڪرڻو آهي، بحيثيت قوم اڄ اسان کي پنهنجو احتساب ڪرڻو پوندو. ان جي لاءِ اسان کي قومي مڪالمو ڪرڻ جي ضرورت آهي ته جيئن ماضي جي غلطين جي واضح نشاندهي سان گڏوگڏ اصلاح ۽ احوال جي منصفاڻي جدوجهد جي شروعات ٿئي جنهن جي شروعات جو پهريون نقطو ميثاق معيشت بڻجي سگهي ٿو. وزيراعظم چيو ته پنهنجي بزرگن وانگر اسان پاڪستان کي دنيا جي معاشي قوت بڻائڻ جو عزم ڪري رکيو آهي، اسان کي دنيا جي وڏي معيشتن ۾ شامل ٿيڻ جو هدف طئي ڪرڻ، اسان جيڪڏهن ائٽمي قوت بڻجي سگهون ٿا ته معاشي قوت ڇو نه ٿا بڻجي سگهون ان جي لاءِ اسان کي ڏينهن رات هڪ ڪرڻو پوندو، دنيا تي اهو ثابت ڪرڻو پوندو ته پاڪستان جذبي ۽ تخليقي صلاحيت ۾ دنيا جي ڪنهن به ملڪ کان گهٽ نه آهي. وزيراعظم چيو ته آزادي وڏي قربانين سان حاصل ٿي آهي، ان جي حفاظت جي لاءِ اسان پنهنجي رت جي آخري ڦڙي تائين وهائينداسين، مايوسيون پکيڙيندڙن کي ٻيهر شڪست ٿيندي، اسان سڀ گڏجي پاڪستان کي معاشي ترقي ۽ خوشحالي سان همڪنار ڪنداسين. بهادر هٿياربند فوج سان گڏجي دشمن جا ناپاڪ ارادا خاڪ ۾ ملائي ڇڏينداسين. هن چيو ته نوجوان اسان جو مستقبل ۽ قيمتي اثاثو آهن، انهن کي هن ملڪ کي اڳتي وٺي وڃڻو آهي، انهن کي موقعن ۽ وسيلن جي فراهمي اسان جي ذميواري آهي، نوجوان ماضي ۾ به اسان جي ترجيحن جو مرڪز رهيا آهن ۽ اڄ به اهي اسان جي ڌيان جو مرڪز آهن. هن چيو ته قائداعظم جي زندگي ۽ جدوجهد گواهه آهي ته توهان سدائين نوجوانن کي ايمان، اتحاد ۽ نظم ۽ ضبط ۽ تعليم حاصل ڪرڻ تي ڌيان ڏيڻ جي بار بار تلقين ڪئي، اڄ نوجوانن سميت اسان سڀني کي ان سبق تي عمل ڪرڻ جي ضرورت آهي، اڄ جي ان تاريخي ڏينهن تي آئون پنهنجي ٻارن، نوجوانن سان دل جي ڳالهه ڪرڻ چاهيان ٿو ته توهان چاهيو ٿا ته پاڪستان دنيا جي جديد ملڪن وانگر ترقي ڪري، ڪشڪول کڻي سمنڊ ۾ اڇلائي ڇڏيو، هتي به معاشي ترقي ۽ سماجي انصاف هجي، اسان دنيا ۾ وڃايل اصل مقام حاصل ڪريون ته اچو پاڪستان جي تقدير سنوارڻ جي لاءِ اسان سڀ هڪ ٿي وڃون، امانت ۽ ديانت سان ڏينهن رات محنت کي پنهنجو شعار بڻائي هن ملڪ کي عظيم بڻايون. وزيراعظم چيو ته خوشي آهي ته 68 سالن کانپوءِ پهريون ڀيرو پاڪستان جي قومي تراني کي ٻيهر رڪارڊ ڪيو ويو آهي جنهن ۾ سڄي ملڪ جي مختلف ثقافتن، رنگن، نسل ۽ پاڪستانين جي صلاحيتن ۽ ڪاميابين کي اجاگر ڪيو ويو آهي. اها وفاق پاڪستان جي خوبصورت گلدستي جي عڪاسي آهي، اطلاعات ۽ نشريات واري وزارت، اسٽيئرنگ ڪميٽي، آءِ ايس پي آر سميت قومي ترانو ٻيهر رڪارڊ ڪندڙ ٽيم کي دل جي گهراين سان مبارڪباد پيش ڪريان ٿو. وزيراعظم چيو ته خوشي جي هن گهڙيءَ ۾ اچو اسان سڀ گڏجي دعا ڪريون ته الله تعاليٰ اسان کي پاڪستان قائم ٿيڻ جي حقيقي مقصدن کي مڪمل ڪرڻ جي لاءِ همت ۽ توفيق عطا فرمائي ته جيئن اسان قيامت جي ڏينهن الله جي حضور ۽ ايندڙ نسلن آڏو سرخرو ٿي سگهون، پاڪستان جي صورت ۾ الله تعاليٰ اسان کي جنهن نعمت سان نوازيو آهي ان جو صحيح معنيٰ ۾ شڪر ادا ڪرڻ جو رڳو اهو ئي طريقو آهي.
