اسلام آباد (اے پی پی) پاک بحریہ پنجاب تے سندھ دے چھل توں متاثرہ علاقیں اچ امدادی سرگرمیاں جاری رکھیاں ہوئن۔ جلال پور ملتان اچ وی بحریہ دیاں ایمرجنسی ریسپانس ٹیماں تعینات کر ݙتیاں گئن، جݙاں جو کشمور، گھوٹکی، سکھر تے شکارپور اچ پہلے توں موجود ٹیماں امدادی کماں اچ مصروف ہن۔ اے ٹیماں ہوورکرافٹ، ریسکیو بوٹاں تے ماہر غوطہ خوراں نال لیس ہن۔ گُزریل 24 گھنٹے اچ 478 چھل توں متاثرہ لوکاں کوں مختلف متاثرہ علاقیں توں محفوظ جہیں تے منتقل کیتا ڳیا۔ پاک بحریہ ولوں ہݨ تئیں 6,860 بندے بچائے ڳئن۔ متاثرہ لوکاں کوں مفت طبی سہولتاں تے ضروری دوائیں وی ݙتیاں ویندیاں پئن پاک بحریہ متاثرین دی مکمل بحالی تئیں ہر ممکن مدد ݙیوݨ دا عزم رکھیندی اے۔
