اسلام آباد۔27اگست(اے پی پی):وفاقی وزیر منصوبہ بندی و ترقی اتے وفاقی فلڈ ریلیف کمیٹی دے چیئرمین احسن اقبال وزارت خارجہ کوں ہدایت کیتی اے جو او اوورسیز پاکستانیاں دی سیلاب فنڈ اچ عطیات جمع کراوݨ کیتے رہنمائی کرے، سارے بیرون ملک مشن اپݨی ویب سائیٹ تے معلومات ݙیون۔ انہاں آکھیا جو کمیونٹی نال رل تے سیلاب ذدگان دی مدد کیتے وݙی مہم شروع کیتی ونڄے۔ ہک بیان اچ انہاں آکھیا جو موسمیاتی تبدیلی دی ایں آفت نال پوری قوم نمٹسی، وفاقی حکومت مسلح افواج نال رل تے صوبیاں دا پورا ہتھ ونݙیندی پئی اے، قوم 2005 دے زلزلے اتے 2010 دے سیلاب آلی کار اپݨے ٻھیݨیں ٻھراواں دے نال تھیوے۔
