آستانہ۔13اکتوبر(اے پی پی):وزیراعظم محمد شہباز شریف آکھیے جو پاکستان دے 3کروڑ توں ودھ متاثرین دی بحالی ٻہوں وݙا چیلنج اے، انہاں دی آباد کاری اچ ݙھاکے لڳلسن ، سیکا دے رکن ملک خطے اچ قیام امن تے تعاون ودھاوݨ کیتے چنڳاں کردار نبھاون ، بھارت آپݨے غیر قانونی زیر تسلط جموں وکشمیراچ فوجی طاقت دا استعمال کریندے ہوئیں غاصبانہ قبضہ اتے کشمیریاں کوں انہاں دے حق خود ارادیت توں محروم کررکھیے ،پاکستان بھارت نال سنجیدہ اتے بامعنی ڳالھ مہاڑ کیتے تیار اے ، عالمی برادری کوں افغانستان اچ پائیدار امن کیتے کردار ادا کرݨا چاہیدے ،سی پیک توں پورے خطے کیتے اقتصادی مواقع پیدا تھیسن ، خمیس کوں قازقستان دے دارالحکومت آستانہ اچ سیکا دے چھیویں سربراہی اجلاس توں خطاب کریندے ہوئیں وزیراعظم محمد شہباز شریف سیکا دے پلیٹ فارم کوں انتہائی اہمیت دا حامل قرار ݙتے۔ انہاں آکھیے جو خطے اچ تعاون ودھاوݨ تے اعتماد سازی دے حوالے نال سیکا اہم کردار ادا کرسڳدی اے ،وزیراعظم آکھیے جو پاکستان کوں ماحولیاتی تبدیلیاں پاروں غیرمعمولی صورتحال دا سامݨا اے، اڄوکے سیلاب اتے مینھ پاروں ملک دا ھک تہائی حصہ پاݨی اچ ٻݙیا ہویا اے ارباں ڈالر دا ضیان تھئے، ،1600 لوک جان دی بازی ہرڳن جݙاں جو ہزاراں کلومیٹر سڑکاں تے پل پاݨی اچ وھہہ ڳئن تے لکھاں ایکڑ تے کھڑیاں فصلاں تباہ تھی ڳن۔ وزیراعظم آکھیے ماحولیاتی آلودگی اچ پاکستان دا حصہ ھک فیصد توں ودھ گھٹ اے لیکن پاکستان ایں کنوں ساریں توں ودھ متاثرہ ملکاں اچ شامل ہن ، انہاں آکھیے جو سیلاب زدگان دی بحالی کیتے پاکستان سارے وسائل استعمال کریندا پئے ،پاکستان دوست ملکاں دا دل کھول تے امداد ݙیوݨ تے شکر گزار ہے، پاکستان اچ 3 کروڑ توں ودھ سیلاب متاثرین دی بحالی ٻہوں وݙا چیلنج اے ، اقوام متحدہ دے سیکرٹری جنرل دے دورہ پاکستان دا شکریہ ادا کرینداں۔ اقوام متحدہ دی طرفوں 816 ملین ڈالر دی امداد دی اڄوکی اپیل خوش آئند اے۔ وزیراعظم آکھیے جو افغانستان اچ پائیدار امن دے قیام کیتے عالمی برادری اپݨا کردار ادا کرے۔ وزیراعظم آکھیے پاکستان ݙھاکیں توں 40 لکھ افغان مہاجرین دی میزبانی کریندا پئے ،اساں دہشت گردی دے خلاف جنگ اچ وݙیاں قربانیاں ݙتن ۔ وزیراعظم آکھیے جو بھارت آپݨے غیر قانونی زیر تسلط جموں وکشمیراچ فوجی طاقت دا استعمال کریندے ہوئیں غاصبانہ قبضہ ڄما رکھیے تے کشمیریاں کوں انہاں دے حق خود ارادیت توں محروم کررکھیے ۔ بھارت اپݨے ہی ملک اچ وسݨ آلیاں اقلیتاں تے ہمسائیں کیتے خطرہ بݨ چکے ۔وزیر اعظم شہباز شریف آکھیے پاکستان بھارت سودھے سارے ہمسائیں نال پرامن تعلقات چاہندے ، اساکوں آپݨے عوام کوں صحت، تعلیم تے روزگار ݙیوݨ کیتے ودھ وسائل مختص کرݨ دی لوڑھ اے ، انہاں آکھیے جو اساں بھارت دے نال ڳالھ مہاڑ کیتے تیار ہیسے لیکن سنجیدہ ، بامعنی تے نتیجہ خیز مذاکرات کیتے بھارت کوں اقدامات کرݨ دی لوڑھ اے ۔ وزیراعظم مشرق وسطیٰ اچ پائیدار امن دے قیام کیتے مسئلہ فلسطین حل کرݨ دی لوڑھ تے زور وی ݙتا ، انہاں سی پیک کوں پورے خطے دی ترقی سانڳے اہم قرار ݙیندے ہوئیں آکھیے جو سی پیک روڈ اینڈ بیلٹ دا اہم منصوبہ اے ایں توں پاکستان سودھے پورے خطے اچ تجارتی سرگرمیاں ودھ ویسن۔
