اسلام آباد ۔13جولائی(اے پی پی) وزیرا عظم شہباز شریف آکھیے ملک اچ عدم استحکام اتے بے یقینی کھنڈاوݨ آلے عناصر کوں بے نقاب کیتا ونڄݨا چاہیدے ،حکومت، ریاست اتے قومی سلامتی دے اداریں بارے چلائی ونڄݨ آلی منظم مہم دا تروڑ کرݨ سانڳے میڈیا حکمت عملی کوں زیادہ موثر بݨاوݨ تے ترجیح ݙتی ونڄے ۔ اے ڳالھ انہاں سینیٹ اچ پاکستان مسلم لیگ (ن) پارلیمانی پارٹی دے لیڈر اتے قائمہ کمیٹی امور خارجہ دے چئیرمین سینیٹر عرفان صدیقی کوں آکھی جنہاں وزیراعظم شہباز شریف نال وزیراعظم ہاؤس اچ ملاقات کیتی ۔ وزیراعظم آفس میڈیا ونگ توں جاری پریس ریلیز موجب ملاقات اچ مجموعی ملکی صورتِ حال، عوام کوں پیش آندے مسئلے تے میڈیا متعلق امور تے ڳالھ تھئی ۔ وزیراعظم شہبازشریف آکھیے حکومت، ریاست اتے قومی سلامتی دے اداریں تے چلائی ونڄݨ آلی منظم مہم دا تروڑ کرݨ تے لوکاں کوں سچ ݙساوݨ کیتے حکومت دے نال مسلم لیگ (ن) کوں وی میڈیا حکمت عملی زیادہ موثر بݨاوݨ تے توجہ ݙیوݨی چاہیدی اے ۔ وزیراعظم آکھیے ملک اچ عدم استحکام تے بے یقینی کھنڈاوݨ آلے عناصر کوں بے نقاب کیتا ونڄݨا چاہیدے۔ وزیراعظم سینٹ اچ مسلم لیگ (ن) دے چنڳے کردار دی تعریف کریندے سینیٹ کوں جمہوری اقدار تے باوقار ماحول سانڳے سارے منتخب ایواناں دی رہنمائی کرݨی چاہیدی اے۔ وزیراعظم شہبازشریف سینیٹرعرفان صدیقی کوں سینٹ قائمہ کمیٹی خارجہ امور دا چئیرمین بݨݨ دی مبارخ ݙتی تے توقع ظاہر کیتی جو انہاں دی سربراہی اچ امور خارجہ کمیٹی پوری دنیا اچ پاکستان دا مثبت، پرامن اتے تعمیری تشخص ابھارݨ تے خصوصی توجہ ݙیسی
